نعرفها، مرى كبيرة، عاملة في احد المؤسسات، تمشي متثاقلة، علامات الخصاصة والفقر المدقع، ظاهرة على وجهها.. الي كان يغطي نصفو "كمامة" قماش..
قالتلي نسألك؟ زعمة الكمامة الي لابستها تحميني من كورونا؟
انا عندي اولادي صغار، بوهم متوفي، وانا العايل الوحيد ليهم. زعمة الكمامة هذي تحميني، باش ما نمرضش، انا خايفه على اولادي، لا نمرض ونموت ويضيعو بعدي.. ما عندهم حد غيري!!
حقيقة، الكلام كان رصاص في القلب.. حكاية قليل وين سمعت كيفها..
الجواب العلمي على سؤالها باش يزيد من خوفها والمها..
الكمامة يلزمها دراسة علمية، تثبت فاعليتها قبل الاستعمال، وعند الاستعمال، وبعد الاستعمال، وبعد الغسلة الاولى للغسلة الاخيرة، وقداش يلزمها من غسلة حتى تفقد فاعليتها.. وهذا مش متوفر..
معناها الجواب العلمي ليها، الكمامة الي عندها ما تحميهاش...
وهذا وحدو رعب اخر ينضاف الى حياتها المرعبة..
واحترت في اجابتها..
واقترحت عليها حلول عملية تتلائم مع وضعها، كيف ما حكاتلي..
وقلت ليها، ماعادش تقول اولادي ما ليهم حد.. انت واولادك، وكلنا، عندنا ربي، رزقنا وصحتنا عندو..
المهم، ثمة برشا كلام على الكمامة، حتى ولات الناس تتصور اني وقت تلبسها، تمنع من كورونا، وما تموتش.. وهذي من اكبر الاخطاء الي اقنعوا بيها الناس..
شيء يوجع القلب..
د. محجوب احمد قاهري