العالم الكل تهز لموت "#فرح" في "#الروقارا"..
وزادا تهز وقت شاف ام فرح، ودارهم، وكيفاش عايشة.. ام فرح من كثرة الحزن والالم الي راتو في حياتها ما عادش عندها دموع في عينيها... دموع تبكي بيه حظها وحظ فرح في دولة الغبن..
لكن ما زال عندها صوت يشكي لربي..
#رئيس #البلدية قال ماهيش خدمتي نراقب الروقارات.. باهي يا سيدي قلنا خدمتك اشنية بالضبط، راهو عنا انسان مات في روقارا في طريق انت مسؤول عليه! وهذي اول حادثة في تاريخ تونس..
مول "الروقارا" متاع #الاوناس قال ما هيش #مسؤوليتي! يا سيدي قلنا انت زادة #مسؤولية اشكون، وانت مسؤول على اشنوة بالضبط!
وخليني نذكركم اني "الاوناس" تخدم في اكثر من 3400 عامل في تراب الجمهورية.. وانها في 2019 دخلت لخزينتها 352 مليار.. اي نعم 352 مليار... وما لقاتش حق غطاء متاع روقارا، وعون يتفقدها حتى في الاسبوع مرة وحدة! باش فرح ما تموتش..
ونذكركم، انو عمق #الروقارا الي طاحت فيها #فرح 8 متر، و قطر الحلقوم متاعها مترو ونص، معناها يلزم تكون تحت مراقبة مستمرة لانها خطيرة..
لكن حد ما اعترف بالحقائق هذي..
#تونس الروقارا هي تونس الشعب المطحون، المغبون، الشعب الي يلهي فيه الاعلام بقضايا ما تخصوش وما تهموش في شيء..
هي تونس الي يلهي فيه الساسة بقضايا وعرك ما يعنيشو..
تونس الروقارا، هي تونس الي تموت فيها فرح، الفقيرة، المدمرة، المزمرة، في روقارا، وحد ما يتحاسب..
ربي يرحمك فرح.. وحقك عند ربي محفوظ..
وصلنا الى قاع القاع، والعركة مازالت قائمة..
وربي يقدر الخير..
_ م أ ق _
د. محجوب احمد قاهري