الخبر:
اليوم الجمعة، في بلاغ لوزارة الداخلية جاء فيه انه تم حجز 1000 كغ من النحاس المهرب على متن شاحنة بالمنطقة الحدودية اولاد مرزوق (القصرين).
التعليق:
الحاصيلو حكاية تهريب النحاس مش جديدة، من زمان وكانت الصحف كل مرّة تتحفنا بخبر من هذا النوع.
بحيثو خيوط التلفونات، والأسلاك الكهربائية، واللي عندو سبالة (حنفيّة)، تصبح ما تلقى شئ..
وين ثمّة نحاس تلقى عيون متربصة، وجاهزة لسرقتو وتهريبو.
هالمرة 1000 كيلو، وقداش من كيلو أخرين تهربو؟؟؟؟؟
ثمة خبراء في هالميدان يهربو حتى الجن الأزرق، وكل ضربة يعملوها رجال الأمن متاعنا هي انتصار.. خاطر باش يجي نهار وما نلقاوش النحاس متاعنا الكل. حتى النحاس في المؤسسات والمعامل متاعنا قابلة للسرقة في أي وقت.. او انها في طور السرقة... كل شئ ممكن.. أولاد الحرام برشة.. والتسيب برشة...
السؤال وين يتهرب النحاس؟ لأي دولة؟ ولأي غرض؟ ثمة اجابات كثيرة وخطيرة زادة.. ولكنها تحتاج الى اثبات..
بحيثو اللي عندو نحاس يرد بالو على روحو... والقصرين راهي مجرد منطقة عبور... حظها انها على الحدود، وأي حاجة تصير تتقيّد عليها...
وتصبحون على الف نحاس... عفوا حب.