 |
| صورة من موقع الصدى |
الأستاذة الفاضلة سلوى شرفي عندها مشكلة مع الدكتور المرزوقي، ومن حقها تقول فيه آش تحب. "وكل اناء بما فيه يرشح".
لكن الأستاذة عندها رأي في اكثر من مليون تونسي انتخبوا الدكتور المرزوقي.
في تدوينة صغيرة على صفحتها على الفيس بوك، الأستاذة سلوى سماتهم "فضلات". قالت بالضبط "خلاصة مسيرة المرزوقي انه وصل الى رئاسة مؤقتة بالفواضل ووصل الى مرتبة المرشح الثاني للرئاسة بالفضلات".
يا للا اذا كان عندك مشكلة مع الدكتور المرزوقي صفّي حساباتك معاه، لكن مليون واحد في نظرك يولوا "فضلات"، هذا غير ممكن وغير مقبول ابدا ابدا.
يا للا لازم تعرف انت وغيرك، اشكون هومة "الفضلات" التي تحك عليهم:
* هم اغلبية 19 ولاية من تراب تونس.
* هم اللي خرجوا الأستعمار بالكفاح الفعلي، الميداني، بالسلاح والنضال الحقيقي.
* هم اللي تعرضوا منذ اكثر من 50 عام الى عملية استغلال سياسي فاحش، ونالوا "الفضلات" من خيارات السياسة الوطنية الظالمة.
* هم اللي نالوا "فضلات" برامج "التنمية" ، وتخيّل انو ثمة ناس الى حدّ الآن ما عندهمش لا ضوء ولا ماء صالح للشراب، ولا حتى دار تحميهم من البرد، وبقاو صامدين، وخيرهم ياكل فيه الغير.
* هم "الفضلات" اللي تعرضوا للرصاص ودفعوا دمائهم، مابين شهداء وجرحى، ليتحرّر الجميع، طبعا الاّ العبيد والمستفيدين.
* هم "الفضلات" اللي تحرموا حتى من التشغيل، البطالة عندهم تصل الى حتى اكثر من 60%، ولكنهم بقاو شامخين وكبار،
* هم "الفضلات" اللي غيروا الجيوساسة في العالم اجمع، وسيغيرون عقول الكثير من الطغاة ومن الفسدة.
* "الفضلات" يا للا، بالرغم من انهم احتقروهم وسماوهم ارهابيين، وفرقوا بينهم وبين ابناء الوطن الواحد، يعدونكم بانهم سيوحدون الوطن بالأحترام، والحرية والديمقراطية، والمساواة والمواطنة..
ووعد الحر دين.
ومن بين "الفضلات" أحدثكم...